DAVAO CITY – Nanawagan sa publiko karun ang Davao City Disaster Risk Reduction and Management Office sa tanang mga residente sa dakbayan sa Dabaw nga mamahimong dili usa maligo o mamasol sa Davao River gumikan sa chemical spill.
Nagpasidaan si Alfredo Baluran, hepe sa CDRRMO, nga likayan usa sa mga residente sa dakbayan ang pagkaligo sa mga suba nga sumpay o konektado sa Suawan ug Davao River tungod posibleng dunay midagayday nga chemical sa maong mga suba.
Kini gumikan sa nahitabong insidente sa Brgy. Suawan, Marilog Davao City pasado ala 1 kaganinang kaadlawon diin nahagbong ang usa ka tanker truck nga kargado sa caustic soda sa pangpang sa Suawan River.
Sumala ni PMaj. Amante L. Nozares, OIC sa Marilog Police Station nga pasado ala 1 kaganinang kaadlawon nadawat nila ang report.
Subay sa imbestigasyon, samtang nagbiyahe ang maong sakyanan sakay ang driver ug helper, kalit matud pa nga giilog ang gibaybay nga dalan sa mga biktima sa kasugat nga sakyanan hinungdan nga nilikay ang mga nahisgutan ug nabangga ang poste ayha kini nahagbong sa maong pangpang.
Gumikan sa kakusog sa impact, nayabo ang karga nga chemical sa maong tanker.
Patay usab ang driver sa tanker nga giilang si Paciano Doydora, 39 anyos ug lumulopyo sa Monkayo, Davao de Oro.
Samtang gidala sab sa balay tambalanan ang helper nga giilang si Jerwin Guinandam, 27 anyos, residente sa Bunawan ning dakbayan sa Davao ug anaa na kini karon sa luwas nga kahimtang.
Sumala sa report, hazardous ang nayabong chemical hinungdan nga kaganinang buntag palang gipa alerto na ang Brgy. duol sa nahitaboan.
Karong adlawa gikatakdang magkuha og sample sa tubig sa sapa ang mga personahe sa DENR, EMB, ug sa City Health Office.
Gitinguha usab sa otoridad nga mahaw-as gilayon ang maong tanker apan kinahanglan matod nga nakuha og una ang karga nga chemical adiser ipaguyod ang Tanker aron dili na modaghan pa ang ang nayabo nga chemicals.
