Nagdala og pag-ulan ug mapanganurong kalangitan sa pipila ka lugar sa Visayas ug Mindanao ang trough o extension sa Tropical Depression nga anaa pa sa gawas sa Philippine Area of Responsibility.
Lakip sa apektado ang Eastern Visayas ug Caraga, ingon man ang Davao Oriental, Misamis Oriental ug Camiguin.
Subay sa pinakabag-ong report sa weather bureau, namatikdan ang Tropical Depression sa gilay-on nga 1,920 kilometro sa sidlakan sa Southeastern Luzon.
Nagpakita kini og kusog sa hangin nga moabot sa 55 kilometro matag oras duol sa sentro, samtang ang paghaguros sa hangin moabot sa 70 kilometro matag oras.
Padayon usab kini sa paglihok paingon sa northwest sa gikusgon nga 25 kilometro matag oras.
Gipahimangnoan ang mga residente sa mga apektadong lugar nga mag-amping batok sa posibleng pagbaha ug pagdahili sa yuta, ilabina sa mga lugar nga makasinati og kusog nga ulan.
Giawhag usab ang publiko nga padayon nga mosubay sa mga pahimangno ug update sa weather bureau.
Kung makasulod sa PAR ang maong Tropical Depression, hatagan kini og lokal nga ngalan nga “Queenie”, nga mahimong ika-17 nga bagyo sa Pilipinas karong 2026.
