Gipasabot ni kanhing Far Eastern University Law Dean Atty. Melencio Sta. Maria nga mahimong magpadayon ang impeachment trial batok kang Vice President Sara Duterte bisan pa og dili motambong ang tibuok defense team sa mga hearing.
Giklaro ni Sta. Maria nga dili mahimong “hostage” ang usa ka constitutional nga pagtaral tungod lamang sa desisyon sa respondent o sa iyang mga abogado. Matud pa niya, kung nahatagan na og igong higayon ang defense nga mopresentar sa ilang mga argumento ug ebidensya apan pilion nilang dili motambong, mahimo kining isipon nga waiver o pagtalikod sa ilang higayon nga makapresentar sa ilang depensa.
Gikumpara sa abogado ang maong sitwasyon sa ordinaryong mga kaso sa korte, diin hatagan ang usa ka partido og higayon nga madungog ug makapresentar sa iyang depensa apan dili mahimong pugson nga gamiton kini nga oportunidad.
Gibutyag usab ni Sta. Maria nga ang impeachment usa ka constitutional nga proseso, busa ang pag-absent sa usa ka partido dili awtomatikong mahimong basehan aron hunongon ang proceedings.
Sa kasamtangan, miingon usab si Senate President Sherwin Gatchalian nga mahimong ipadayon ang impeachment trial basta adunay quorum ang Senate Impeachment Court, bisan pa og wala ang defense.
Kahinumduman nga ang defense ni VP Sara nagpahayag nga magpadayon kini sa pag-apil sa proceedings ad cautelam, o may pag-amping ug reserba sa ilang mga legal nga remedyo, human mausab sa Impeachment Court ang pamaagi sa pagkalkula sa voting threshold alang sa conviction.
