Gimando na sa Korte ang pagdakop kang Datu Unsay,Maguindanao del Sur Mayor Xyril Ampatuan ug 11 ka indibidwal tungod sa kasong terorismo nga adunay kalabotan sa pag-ambush sa Shariff Aguak Mayor kaniadtong Enero ning tuiga.
Ang warrant of arrest gipagawas ni Presiding Judge Alberto Quinto sa Iligan City Regional Trial Court Branch 1, diin tulo ka counts sa terrorism ubos sa Republic Act 11479 ang giatubang ni Ampatuan ug non-bailable ang maong mga kaso.
Giakusahan si Ampatuan nga nalambigit sa pag-atake kang Shariff Aguak Mayor Akmad “Mitra” Ampatuan kaniadtong Enero 25. Sakay sa itom nga SUV ang mayor ug gisundan sa iyang mga security escort sa dihang giigo sa rocket-propelled grenade o RPG ug gipusil sa mga armado.
Lakip sa ubang gi-issue-han og warrant sila Ababang Salik, Edad Pendatun, Aboher Guimbangan, Toraipie Lusod, Gapor Magaluyan, Mohamad Uday, Samsudin Mokamad, Saudi Guiapal, Johari Guiapal, Soy Kali ug Datuben Gyon Allib Dimao.
Anak si Xyril sa kanhi mayor sa Datu Unsay nga si Andal Ampatuan Jr., nga usa sa mga suspek sa 2009 Maguindanao massacre nga mipatay og 58 ka tawo, lakip ang mga journalist.
