Gipasiguro ni Senate Committee on Energy Chairman Erwin Tulfo nga dili mahimong ibalhin sa laing bahin sa electricity bill ang systems loss charge kung matangtang na kini nga singil sa mga konsumidor.
Naghimo si Tulfo sa maong pahayag human nabalaka ang pipila ka konsumidor nga basin bawi-on lamang sa mga electric company ang mawala nga systems loss charge pinaagi sa pagpataas sa distribution, supply o uban pang singil.
Sumala kang Tulfo, klaro sa Senate Bill No. 2486 o “Systems Loss Charge Removal Act” nga dili mahimong i-recover sa distribution utilities ug electric cooperatives ang allowed losses pinaagi sa laing mga charge.
Lakip niini ang distribution wheeling charges, supply charges, metering charges, universal charges ug subsidies, ingon man ang uban pang bahin sa electricity bill.Giklaro ni Tulfo nga dili mahimong tangtangon ang systems loss charge sa usa ka bahin sa bill apan isingit lamang ang parehas nga gasto sa laing singil.
Gisponsor usab sa senador sa plenaryo niadtong Septiyembre 22 ang maong sugyot, nga kabahin sa mga priority measure sa administrasyon. Gibutyag usab niini, nga dili angay pas-anon sa mga konsumidor ang bayad sa kuryente nga wala nila magamit, ilabina kung ang losses naggikan sa problema sa pagdumala o kabtangan sa mga electric utility.
“Nganong kinahanglan man ang konsumidor ang mosalo sa kuryente nga wala man niya magamit?” matud pa sa senador.
Giduso niya ang paspas nga pag-uswag sa maong sugyot aron matangtang ang systems loss charge ug mapanalipdan ang mga konsumidor batok sa posibleng pagbalhin sa maong gasto ngadto sa ubang bahin sa ilang electricity bill.
Matud pa ni Tulfo, unang panginahanglan ang kuryente busa kinahanglan nga masiguro ang hapsay nga serbisyo ug patas nga pagsingil sa mga konsumidor.
