Motubag ug gilaumang motambong ugmang adlawa, Septiyembre 25,2026 si Senador Robin Padilla sa Department of Justice alang sa reklamo nga obstruction of justice nga gisang-at batok kaniya ug kang Lt. Col. Jean Alla Yasin Robles.
Kalabot kini sa alegasyong pagtabang nila kang Senador Ronald “Bato” dela Rosa nga makabiya sa Senate premises sayong kabuntagon kaniadtong Mayo 14, 2026.
Sa impeachment trial ni Vice President Sara Duterte kagahapon, nagpasidaan si Padilla nga basin dili na siya makauban sa iyang mga kaubang senador sa mosunod nga mga adlaw.
Sumala pa niini, “Baka ito na rin ang huli kong araw dito. Baka ma-miss ko na kayo.”
Gipatawag sila ni Robles aron mosumiter og counter-affidavit isip tubag sa reklamo nga gisang-at sa Philippine National Police-Criminal Investigation and Detection Group o PNP-CIDG.
Miangkon si Padilla nga misakay sa iyang SUV si Dela Rosa atong higayona, apan iyang gipaklaro nga dili kini pag-ikyas.
Wanted si Dela Rosa sa International Criminal Court nga adunay kalabotan sa mga alegasyon sa crimes against humanity nga konektado sa drug war atol sa administrasyon ni kanhi Pangulong Rodrigo Duterte.
Pagpaklaro sa DOJ nga ang subpoena dili pa nagpasabot nga napamatud-ang sad-an ang mga respondent, tungod kay kabahin pa lamang kini sa preliminary investigation diin hatagan sila og higayon nga tubagon ang mga alegasyon.
Kahinumdoman usab nga una nang girekomenda sa CIDG ang pagsang-at og obstruction of justice complaint batok kang Padilla ug uban pang mga indibidwal nga giingong mitabang sa pag-ikyas ni Dela Rosa gikan sa Senado.
Base sa imbestigasyon sa CIDG, dili lamang yano nga “hitch ride” ang pagbiya ni Dela Rosa gikan sa Senate premises.
