Padayon ang impeachment trial ni Vice President Sara Duterte bisan pa sa duha ka petition nga gisang-at sa Supreme Court aron kuwestiyonon ang bag-ong desisyon sa Senate Impeachment Court kabahin sa 2/3 voting threshold.
Gikumpirma ni Impeachment Court Spokesperson Atty. Reginald Tongol nga sundon gihapon sa korte ang naunang iskedyul, diin magpadayon ang pagdungog sa Lunes, Septiyembre 28, alang sa regular nga direct examination ug cross-examination sa testigo sa prosekusyon.
Giila sa Impeachment Court ang magbulag nga petition for certiorari nga gisang-at nila Atty. Victor Rodriguez ug Atty. Ernesto Francisco, nga nangayo sa Supreme Court og legal nga remedyo batok sa maong ruling.
Si Rodriguez nangayo og temporary restraining order o TRO, samtang si Francisco nangayo og status quo ante order o SQAO aron mapahunong ang implementasyon sa bag-ong ruling. Apan matud ni Tongol, wala pa makadawat ang Senate Impeachment Court og opisyal nga notice o kopya sa maong mga petition, lakip ang bisan unsang direktiba gikan sa Supreme Court.
Tungod niini, dili pa mahimong maglihok ang Impeachment Court base lamang sa mga balita bahin sa pagpasaka sa mga petition, ilabina samtang wala pa’y nadawat nga opisyal nga mando gikan sa korte suprema.
Samtang, nagpabiling independente ang duha ka proseso, diin nagpadayon ang Impeachment Court sa pagdungog sa kaso samtang ang Supreme Court maoy motan-aw sa mga petition nga gisang-at niini.
Sa pagkakaron, nagpadayon ang impeachment proceedings sumala sa iskedyul, gawas lamang kung adunay TRO, injunction o laing direktiba gikan sa Supreme Court nga magmando sa paghunong niini.
