Gitugyan na lamang ni Senator Christopher “Bong” Go sa Supreme Court ang paghusay sa isyu sa voting threshold sa Senate Impeachment Court.
Matud pa ni Go, ang Supreme Court na ang motino sa maong isyu aron matapus na ang panaglalis bahin sa gikinahanglang ihap sa boto alang sa conviction.
Gipatin-aw usab sa senador nga dili sila mahimong maghatag og komento o pahayag bahin sa mga isyu nga may kalabotan sa Senate Impeachment Court, tungod kay gidid-an sila sa mga lagda sa maong proseso.
Kahinumduman nga duha na ka petisyon ang gisumite sa Supreme Court nga nagkuwestiyon sa desisyon sa Senate Impeachment Court nga nag-usab sa voting threshold alang sa conviction.
Tumong sa mga petisyon nga ipawalay-bisa ang maong desisyon ug mangayo og legal nga pagpatin-aw bahin sa hustong pag-ihap sa gikinahanglang boto sa impeachment proceedings.
Sa pagkakaron, nagpabiling giatubang sa legal nga proseso ang isyu sa voting threshold samtang gihulat ang aksyon sa Supreme Court sa mga petisyon nga may kalabotan niini.
