DAVAO CITY – Mikabat sa 41 ka mga pamilya nga nanimuyo sa nagkadaiyang areas sa siyudad ang gipahimangnoan nga mobakwit ilabi na kadtong mga residente nga anaa sa landslide prone areas.
Kini ang panawagan sa lokal nga panggamhanan human ang gipahigayon nga validation sa pipila ka mga lugar human ang sunod-sunod nga linog diin nasayran nga mihuyang sumala pa ang yuta.
Pipila sa nahisgutan nga areas ang gilangkuban sa Juario Village sa Maa ug DDF Village-Phase 5 sa Mandug. Kalakip sab sa listahan ang Old Smokey Mountain sa Carlos P. Garcia Highway o Diversion Road sa Matina Pangi; Purok Damayan sa Barangay Buhangin; samtang ang Purok 5 sa Barangay Baganihan sa Marilog ang padayon pa nga gisubay.
Una ng gibutyag ni Davao City Risk Reduction Management Office (CDRRMO) chief Alfredo Baloran nga ang maong mga areas delikado na ug matawag nga danger zones tungod sa sagunson nga linog.
Sa inisyal nga pagpanubay sa ahensiya sa 41 ka mga pamilya, 15 sa DDF Village ug Juario Village ang anaa sa delikado nga kahimtang.
