Bisan pa man sa padayon nga pag absent sa Senado, nagsugyot si Senador Ronald “Bato” dela Rosa ug duha ka balaod, lakip na sa mga gisugyot batok sa kuno’y foreign interference sa nasud.
Base sa rekord sa Senado, gipirmahan ni Dela Rosa ang Senate Bill 2079 ug 2080 niadtong Mayo 4, kini human sa pagbalik sa sesyon human ang usa ka buwan nga recess.
Gisumite ang maong balaod sa iyang legislative staff ug pormal nga gibasa sa plenaryo niadtong Mayo 6.
Tumong sa maong Senate Bill 2080 o Counter Foreign Interference Act nga ilhon ug silotan ang foreign interference sa nasud, lakip na ang pagbuo sa usa ka konseho nga motuok sa mga hisgutanong may kalabutan sa politika, ekonomiya, teknolohiya, edukasyon, balaod ug seguridad sa nasud.
Samtang, ang Senate Bill 2079 o National Police Clearace System Act nagatumong nga pakusgan ang police clearance system pinaagi sa centralized database para sa mga crime incidents, arrest warrants, ug records sa mga nasikop ug wanterd nga indibidwal.
Dili pa makapakita sa publiko si Dela Rosa ug wala sab nakaapil sa sesyon sa Senado gikan pa niadtong Noyembre 2025, human sa mga taho nga kuno’y gipagawas nga warrant of arrest batok sa iya sa International Criminal Court kabalutan sa kontrobersyal sa War on Drugs sa milabay nga administrasyon.
Tungod niini, nag-atubang si Dela Rosa sa ethics complaint nga may kalabutan sa iyang padayon nga pag absent. Niadtong Lunes, gilauman sa Senate ethics committee ang iyang eksplanasyon kalabut sa suhestiyon nga “no work, no pay” policy batok sa mga absentee senator.
