Mireklamo si kanhing Senador Antonio Trillanes IV batok sa giingong wala pay senador nga naaresto sulod sa taas nga kapulungan sa Kongreso human sa pagsulay sa pag-aresto kang Senador Ronald “Bato” Dela Rosa.
Sa interbyu sa media sulod sa Senado, gitawag ni Trillanes nga bakakon ang nagsulti nga wala pay senador nga nadakpan sulod sa kapulungan.
Gibalik ni Trillanes ang nahitabo kaniya kaniadto diin siya gi-aresto samtang nagpadayon ang sesyon sa Senado.
Gipakita usab niya ang video sa pagsilbi sa arrest warrant ug pagbasa sa iyang Miranda rights sulod sa premises sa Senado.
kahinumdoman nga niadtong 2018, gipailawom usab si Trillanes sa protective custody sa Senado pinaagi ni kanhing Senate President Vicente Sotto II.
Nasayran nga ang iyang pag-aresto kaniadto may kalabotan sa kasong rebellion human bawi-on ni kanhing Pangulong Rodrigo Duterte ang iyang amnesty.
Gikustodiya si Trillanes sa Senado sa wala pa siya makapiansa. Nakadesisyon usab ang Supreme Court of the Philippines niadtong 2024 nga supak sa balaod ang pagbawi sa kanhing Pangulo sa amnesty.
Samtang, gawas kang Trillanes, naaresto usab si Leila De Lima samtang atua sulod sa Senado tungod sa mga kasong may kalabotan sa illegal drug trade.
Gisilbihan kini og arrest warrant pinaagi sa koordinasyon sa PNP ug Senate Sergeant-at-Arms.
Mitahan usab si De Lima apan mipadayag nga inosente siya. Bag-o lang usab siya napamatud-an nga walay sala sa tanang drug-related cases batok kaniya.
