Gisaway ni Vice President Sara Duterte ang pagsulay sa pagsilbi sa arrest warrant gikan sa International Criminal Court batok kang Senador Ronald “Bato” Dela Rosa.
Gibutyag sa Bise Presidente nga ang warrant nga gikan sa laing nasod kinahanglan una ipresentar sa lokal nga korte sa Pilipinas.
Gihimo sa Bise Presidente ang maong pahayag atol sa interbyu kaniya sa The Hague, Netherlands, diin iyang gibisita ang iyang amahan nga si kanhi Pangulong Rodrigo Duterte nga kasamtangang nakakustodiya.
Matod niya, dili husto ang nahimong lakang batok sa senador nga iyang gitandi sa nahitabo kaniadto sa pagdakop sa iyang amahan sa wala pa kini gidala sa The Hague.
Kahinumdoman nga gisilbihan og ICC arrest warrant ang kanhi Pangulo niadtong Marso 2025 ug dayon gilupad paingon sa The Hague human madakpan ug mapugngan sa Villamor Air Base.
Samtang, midumili usab ang Bise Presidente sa pagkomento kabahin sa kausaban sa liderato sa Senado.
Matod niya, ang maong isyu anaa na sa kaugalingong pagdesisyon sa mga senador.
