Na-monitor sa Armed Forces of the Philippines (AFP) ang kinatibuk-an nga 35 ka mga barko sa China sa lain-laing bahin sa West Philippine Sea gikan Mayo 4 hangtod 11, nga gilangkuban sa China Coast Guard (CCG) ug People’s Liberation Army Navy (PLA-N).
Sumala kang AFP West Philippine Sea spokesperson Rear Admiral Roy Vincent Trinidad (Reserve), nakita ang mga barko sa Ayungin Shoal, Bajo de Masinloc, Escoda Shoal, ug Pag-asa Island.
Sa Ayungin Shoal, natala ang 6 ka CCG ug 1 ka PLA-N ship. Sa Bajo de Masinloc, 9 ka CCG ug 8 ka PLA-N vessels ang namonitor. Sa Escoda Shoal, adunay 2 ka CCG ug 3 ka PLA-N ships, samtang sa Pag-asa Island, 3 ka CCG ug 3 ka PLA-N vessels ang nakita.
Gipunting ni Trinidad nga ang presensya sa China sa sulod sa exclusive economic zone (EEZ) sa Pilipinas giisip nga “illegal presence,” ug maoy usa sa rason ngano nga gipalig-on sa AFP ang ilahang Comprehensive Archipelagic Defense Concept (CADC).
Nagpadayon ang AFP sa maritime ug aerial patrols aron protektahan ang soberanya ug sovereign rights sa nasod.
Gisugyot usab sa militar ang suporta sa plano nga ASEAN Maritime Center, nga giingong makapalig-on sa koordinasyon sa mga nasod sa Southeast Asia bahin sa seguridad sa dagat.
