Gipahibalo sa National Bureau of Investigation nga ilang imbestigahan ang pipila ka mga “vloggers” nga nalambigit sa pagpangikil aron lamang makakuha og kwarta.
Matod ni NBI Dir. Atty. Melvin Matibag, ilang tan-awon usab ang ubang mga indibidwal o “online content creators” nga adunay susamang kalihokan. Kini human sa pagdakop sa online media network personality nga si Franco Mabanta ug uban pa niyang kauban sa kasong extortion.
Base sa impormasyon, giingong nangikil kuno ang mga nasangpit kang former House Speaker Martin Romualdez og kantidad nga mokabat sa 300 milyon pesos.
Giingong puli o bayad kini aron dili ipagawas sa online media network ang usa ka “video expose” nga magpasangil sa mambabalaod sa isyu sa korapsyon.
Apan, malampuson kining nabisto sa ahensya pinaagi sa gihimong entrapment operation diin mismo ang founder sa Peanut Gallery Media Network nga si Mabanta maoy nadakpan.
Mipadayon usab si Director Matibag sa pagpasiugda nga walay kalabotan sa politika ang kaso ug dili tumong sa kawanihan nga dakpon o unahon ang mga kritiko sa administrasyon ni Pang. Ferdinand Marcos Jr..
Nagtuo si NBI Director Matibag nga kinahanglan manubag ang mga indibidwal nga nagdaot sa reputasyon sa uban aron lamang makapangolekta og kwarta o makakuha og posisyon.
