Gikalipay sa Office of the Prosecutor sa International Criminal Court ang pag-isyu sa arrest warrant batok kang Senador Ronald “Bato” Dela Rosa, nga opisyal nga giila na karon isip suspek sa nagpadayon nga kaso sa crimes against humanity sa ICC.
Sa usa ka pahayag, gibutyag sa OTP nga importante kaayo kini nga lakang sa padayon nga pagpangita og hustisya ug pagsagubang sa akusasyon sa mga krimen nga giingong nahitabo sa kampanya kontra droga sa Pilipinas.
Matod sa OTP, ipadayon nila ang hugot nga koordinasyon sa ICC Registry ug uban pang stakeholders aron mapadali ang pagsilbi sa warrant.
Gibutyag usab sa Prosecutor nga ang secret arrest warrant gi-isyu niadtong Nobyembre 6, 2025, tulo ka adlaw human gisumite ang request.
Gipahibalo kini sa mga otoridad sa Pilipinas human kini gi-isyu. Kagahapong adlawa, gimando sa ICC Pre-Trial Chamber I ang pag-usab sa status sa warrant gikan sa “confidential” ngadto sa “public.”
Kahinumduman nga si Dela Rosa giila nga usa sa mga co-perpetrator ni kanhi Pangulong Rodrigo Duterte sa giingong crimes against humanity.
Sumala sa OTP, base sa ilang ebidensya, nakita sa Trial Chamber nga adunay “reasonable grounds” o igong basehan nga motuo nga si Dela Rosa, isip kanhi Davao City Police Director ug human nahimong PNP Chief, responsable sa mga krimen batok sa katawhan tungod sa giingong mga pagpamatay panahon sa drug war sa administrasyong Duterte.
