Posibleng mosulod sa Philippine Area of Responsibility (PAR) karong semanaha ang Tropical Storm nga “Hagupit” ug pagatawgon kini nga “Caloy” kung makasulod na sa nasud, sumala sa Philippine Atmospheric Geophysical and Astronomical Services Administration o PAGASA.
Sa weather advisory kaganihang buntag, gibutyag sa state weather bureau nga ang sentro sa bagyo katapusang nasiplatan sa gilay-on nga 1,615 kilometro sa sidlakan sa amihanang-sidlakang bahin sa Mindanao.
Ang bagyo adunay kusog sa hangin nga moabot og 75 kilometers per hour duol sa sentro ug paghaguros hangtod sa 90 kph samtang naglihok paingon sa kasadpan sa tulin nga 20 kph.
Matod sa weather bureau, magpadayon ang paglihok sa “Hagupit” paingon sa kasadpan sulod sa mosunod nga mga oras una kini moliko paingon sa kasadpang-amihanan.
Gilauman usab nga makasulod kini sa PAR sa Sabado sa gabii hangtod Domingo sa buntag.
Posible usab nga mokusog pa ang “Hagupit” ug mahimong high-end tropical storm sulod sa sunod 48 oras ayha kini mohuyang pag-usab ug mahimong tropical depression pag-abot sa Martes samtang anaa sa Philippine Sea.
Bisan pa niini, gibutyag sa hingtungdan nga ahensya nga gamay lamang ang posibilidad nga direktang makaapekto ang bagyo sa panahon ug kahimtang sa dagat sa nasud sulod sa sunod nga tulo ka mga adlaw.
Samtang, gibantayan usab sa weather bureau ang usa ka low pressure area (LPA) nga nasiplatan sa 120 kilometro habagatan-sidlakan sa Hinatuan.
Bisan og gamay lamang ang tsansa nga mahimong bagyo ang LPA, gilauman nga magdala kini og madag-umon nga kalangitan, katag-katag nga ulan, ug thunderstorms sa Central Visayas, Eastern Visayas, Negros Island Region, Caraga, Northern Mindanao, Davao Region, ug Zamboanga Peninsula.
