Mipahawa na sa iyang pwesto isip mayor ang usa ka babaeng politiko sa California human kini gipasakaan og kaso gumikan sumala pa nga paglihok isip iligal nga Chinese Agent sa China.
Giila ang opisyal nga si Eileen Wang, 58 anyos, giakusahan sa federal court sa Estados Unidos sa kasong felony, sumala sa pahayag sa U.S. Attorney’s Office niadtong Mayo 11. Human niini, gikumpirma usab nga siya mi-resign isip mayor ug konsehal sa Arcadia.
Nasayran nga si Wang bag-o pa nga nanumpa isip mayor niadtong Pebrero 16.
Sumala sa mga prosecutor, gilauman nga mag-plead guilty si Wang sulod sa umaabot nga mga semana.
Sumala pa sa imbistigasyon nga sa mga federal prosecutors nga si Wang ug si Yaoning ‘Mike’ Sun, 65 anyos gikan sa Chino Hills, nagtinabangay sa pagpakatag og pro-China o pro-PRC propaganda sa Estados Unidos gikan sa ulahing bahin sa 2020 hangtod 2022.
Gigamit nila ang website nga “U.S. News Center,” nga nagpakaaron-ingnong news source alang sa Chinese American community.
Gipasanginlan usab nga si Wang ug Sun nagdawat og direktiba gikan sa mga opisyal sa People’s Republic of China (PRC) aron mag-post og pro-China nga mga artikulo sa website.
Gigamit usab sumala pa nila ang encrypted nga mensahe sa WeChat alang sa komunikasyon sa mga opisyal sa China.
Sa usa ka insidente, giingong gihatagan si Wang og instruksyon nga magpatik og partikular nga artikulo, ug pagkahuman iyang gipadala sa usa ka PRC official ang datos nga nagpakita nga kapin 15,000 ka tawo ang nakakita sa maong artikulo.
Si Wang nahimong miyembro sa Arcadia City Council niadtong 2022 ug kaniadto mibutyag kini nga misulod siya sa serbisyo publiko tungod sa iyang gugma sa siyudad ug komunidad sa nasud Amerika.
