DAVAO CITY – Kumpirmado na nga nagpositibo sa Coronavirus disease (Covid-19) ang usa ka babaye nga pasyente nga una nang gipailalom sa home-quarantine sulod sa duruha ka semana diin kini na ang ikatulong kaso sa makamatay nga virus nga natala sa Mati City.
Gipagula ang kumpirmasyon niini sa Department of Health kagahapon sa hapon.
Sumala pa kang Mati Incident Management Team commander Dr. Ben Hur Catbagan Jr. si Patient #3 ang gi-deklara isip PUI human nga nagpakita kini og flu-like symptoms duruha ka semana na ang milabay.
Tanan nga mga contacts niini ang gipailalom gilayon sa self-quarantine sulod sa duruha ka semana diin pipila niini ang asymptomatic.
Gani, anaa sumala pa sa maayo ang kahimtang sa pasyente ayha pa man migawas ang confirmatory test niini.
Isip usa ka precaution ug protocol, gikanayon ni Dr. Catbagan, nga gidala ang pasyente sa Davao Regional Medical Center alang sa evaluation.
Gawas sumala pa kang Patient #3, adunay duruha ka PUIs ang nag-negatibo ang ilang resulta.
Sa pikas nga bahin, maayo na sab sumala pa karon ang kahimtang nila ni Ph1514 ug Ph1516 samtang anaa sa DRMC sa Tagum City ug naghulat na lamang karon og resulta sa ilang follow-up test aron nga masayran kung cleared na kini sa virus.
Sa higayon nga ma-cleared na ang pasyente, mamahimong papauli-on na kini sa ilang panimalay apan kinahanglan pa gihapon nga magpabilin kini sulod sa duruha ka semana o magpailalom sa home quarantine isip safety precaution.
Sa kasamtangan, wala pay ebidensiya nga adunay nahitabo nga community transmission sa siyudad sa Mati.
