Nagpasidaan ang Iran nga mahimong maapektuhan ang kasamtangang ceasefire understanding niini uban sa United States kung magpadayon ang mga pag-atake sa Israel sa Beirut, Lebanon.
Sumala kang Iranian Foreign Minister Abbas Araghchi, ang kasabutan uban sa Washington naglangkob sa ceasefire sa tanang mga front, lakip na ang Lebanon, ug ang bisan unsang paglapas niini mahimong hinungdan sa pagkabungkag sa tibuok kasabutan.
Ang pahayag gisundan sa mando ni Isreali PM Benjamin Netanyahu nga maglusad og airstrikes sa Dahieh district sa Beirut, nga iyang gihulagway nga “terror infrastructure” nga adunay kalambigitan sa mga rocket ug drone attacks nga giingong gihimo sa Hezbollah.
Sa laing bahin, gibutyag ni US Pres. Donald Trump nga padayon siyang nakigkomunikar sa nagkalainlaing bahin lakip si Netanyahu ug mga representante nga may kalambigitan sa Hezbollah.
Sa iyang social media posts, gipahayag ni Trump nga walay tropang ipadala ngadto sa Beirut tungod sa giingong kasabutan nga mohunong ang panagbangi tugbang sa paghunong sa Israel sa pagpamomba sa Lebanon.
Apan hangtod karon, wala pay opisyal nga kumpirmasyon kabahin sa giingong direktang komunikasyon tali sa Estados Unidos ug Hezbollah.
