Gipasalig sa National Irrigation Administration nga andam kini sa posibleng grabeng epekto sa El Niño pinaagi sa mga proyekto nga nagpunting sa climate resiliency ug pagsiguro sa igo nga suplay sa tubig alang sa agrikultura.
Sa usa ka interbyu, gibutyag ni NIA Administrator Eduardo Guillen nga dugay nang nangandam ang ahensya alang sa mga epekto sa climate change ug hulaw.
Matud sa opisyal, padayon nga nagpatuman ang NIA og mitigation ug adaptation projects aron maminusan ang epekto sa kakulang sa tubig sa mga umahan.
Bisan pa sa pagkunhod sa lebel sa tubig sa pipila ka dam sa nasud, gibutyag ni Guillen nga hugot nilang ginamonitor ang sitwasyon aron masiguro ang hustong pag-apod-apod sa tubig alang sa irigasyon.
Nanawagan usab ang NIA sa mga mag-uuma nga motanom og high-value crops nga wala kaayo nanginahanglan og daghang tubig sama sa mais ug monggos aron makatabang sa pag-angay sa epekto sa El Niño.
Dugang pa niya, nagkoordinar ang NIA sa Department of Agriculture ug mga lokal nga panggamhanan aron matabangan ang mga mag-uuma sa pagpili og alternatibong mga tanom.
