Gilimod sa Armed Forces of the Philippines (AFP) ang mga taho nga nag-ingon nga nagpahigayon og military drills ang China sa West Philippine Sea, ilabina sa Bajo de Masinloc, ug giingong walay kamatuoran ang maong pahayag.
Sumala pa ni Rear Admiral Roy Vincent Trinidad, special spokesperson sa AFP alang sa West Philippine Sea, kasagarang taktika sa China ang pagpagawas og propaganda sa matag higayon nga adunay military exercises o kooperatibong pagbansay ang Pilipinas uban sa iyang mga kaalyado.
Gipasabot ni Trinidad nga wala sila makamatikod og organisado nga lihok, tactical maneuvers, o joint formations sa mga barko sa People’s Liberation Army Navy ug China Coast Guard nga mahimong ikonsidera isip military exercise.
Hinuon, anaa lamang matud niya ang nagkalainlaing barko nga nagkatag sa palibot sa Bajo de Masinloc.
Sa maong panahon, malampusong gipahigayon sa AFP, Philippine Coast Guard ug United States Indo-Pacific Command ang lima ka adlaw nga Maritime Cooperative Activity gikan Mayo 26 hangtod Mayo 30, ning tuiga sa maong lugar.
Lakip sa mga kalihokan ang search and rescue drills, maritime law enforcement training ug live communication exercises nga nagtumong sa pagpalig-on sa depensa ug interoperability tali sa Pilipinas ug Estados Unidos.
Samtang kabahin niini, giangkon sa China nga nagpahigayon kini og combat readiness patrols sa Scarborough Shoal isip tubag kuno sa gitawag nilang “rights violations” sa rehiyon.
Apan, hugot kining gisupak sa AFP ug gi-awhag ang publiko nga dili dayong motuo sa mga impormasyon nga ilang gihulagway nga propaganda.
Ang Bajo de Masinloc, nga nailhan usab isip Scarborough Shoal o Panatag Shoal, nahimutang sulod sa 200-nautical-mile Exclusive Economic Zone (EEZ) sa Pilipinas ubos sa mga probisyon sa United Nations Convention on the Law of the Sea (UNCLOS).
Dugang pa niini, giila sa arbitral ruling niadtong 2016 nga walay ligal nga basihan ang halapad nga pag-angkon sa China sa kadagatan sa West Phil. Sea.
