Gibag-o sa House prosecution panel ang pagbahin sa mga responsibilidad sa pipila ka miyembro niini isip pagpangandam sa gilaumang pagsugod sa impeachment trial batok kang Vice President Sara Duterte.
Sumala ni House Justice Committee Chair ug lead prosecutor Gerville Luistro, dili na siya ang mangulo sa grupo nga motutok sa pipila ka mga reklamo batok sa Bise Presidente aron makapokus siya sa iyang papel isip lead prosecutor.
Tungod niini, si Manila Representative Joel Chua na ang mangulo sa team nga mosusi sa alegasyong maanomalyang paggamit sa confidential ug intelligence funds.
Samtang si Bukidnon Representative Keith Flores maoy motutok sa impeachment article nga may kalabutan sa giingong bribery o panuhol sa panahon nga kalihim pa si VP Sara sa Department of Education.
Sa pagkakaron, padayon nga gisusi sa prosecution panel ang tanang mga alegasyon nga nalakip sa matag article of impeachment pinaagi sa regular nga mga miting, workshops ug mock proceedings isip pagpangandam sa pormal nga paglilitis.
Gilauman usab nga sa sunod semana matapos na ang 10 ka adlaw nga palugit nga gihatag sa kampo ni VP Sara aron motubag sa mga alegasyong nakapaloob sa impeachment complaint batok kaniya.
