Gipasalig ni Department of the Interior and Local Government (DILG) Secretary Jonvic Remulla nga walay espesyal nga pagtratar nga madawat si Sen. Jinggoy Estrada ug ang ubang akusado sa giingong P537 milyon nga flood control corruption scandal.
Matud ni Remulla, moagi si Estrada sa susamang proseso nga gipatuman sa tanang persona nga anaa sa kustodiya sa kapulisan, lakip na ang booking procedures, fingerprinting, mugshots ug medical examination.
Kahinumduman nga gidakop si Estrada sulod sa Senado human giselbihan og warrant of arrest nga gipagula sa Sandiganbayan kalabot sa kasong plunder nga gisang-at sa Office of the Ombudsman.
Human mabasahan sa iyang mga katungod ug mapahibalo sa mga kaso nga iyang giatubang sa presensya sa iyang abogado, gidala kini sa CIDG headquarters sa Camp Crame alang sa gikinahanglang mga proseso.
Samtang kabahin niini, gibutyag ni Remulla nga adunay mubo nga panaglalis tali kanila ni Senate Pres. Alan Peter Cayetano atol sa pagpatuman sa pagdakop.
Matud sa kalihim, mipugos si Cayetano nga dili angay dakpon ang usa ka senador sulod sa Senado ug kinahanglan una kining mogawas sa bilding sa dili pa ipatuman ang warrant.
Apan, gibutyag ni Remulla nga walay balaod nga nagdili sa mga otoridad sa pagdakop sulod sa Senado. Human makompleto ang mga proseso sa Camp Crame, gidala si Estrada ngadto sa Sandiganbayan alang sa mosunod nga legal nga mga lakang.
Lakip usab sa warrant of arrest si kanhi DPWH Secretary Manuel Bonoan ug ubang respondents sa kaso. Sumala sa DILG chief, tanan nga nalambigit sa kaso anaa na sa kustodiya o na-account na sa mga otoridad.
