Dawaton sa Philippine Olympic Committee (POC) ang suspensyon nga gipataw sa International Volleyball Federation (FIVB) batok sa Philippine National Volleyball Federation (PNVF), samtang gilauman nga pagahisgutan usab ang posible nga opisyal nga pagsuspinde niini sa umaabot nga general assembly sa Hunyo.
Sumala ni POC President Abraham “Bambol” Tolentino, gitahod sa komite ang mga lagda ug desisyon sa international sports federations ug kinahanglan nga motuman niini ang mga national sports associations sa nasud.
Gipasiugda ni Tolentino nga bisan pa sa maong kalamboan, magpadayon ang POC sa pagsuporta ug pagpanalipod sa kaayohan sa mga atletang Pilipino aron dili maapektuhan ang ilang partisipasyon sa mga kompetisyon.
Nahinumduman nga gisuspinde sa FIVB ang PNVF tungod sa giingong seryosong isyu sa governance, mga alegadong paglapas sa contractual obligations may kalabutan sa Beach Pro Tour event, ug mga giingong paglapas sa FIVB Code of Ethics.
Aron masiguro ang padayong operasyon sa volleyball sa nasud, nagtukod usab ang FIVB og ad hoc committee nga maoy temporaryong modumala sa mga kalihokan sa PNVF samtang nagpadayon ang independent investigation sa maong mga alegasyon.
