DAVAO CITY – Gibutyag sa Public Safety Security Command Center (PSSCC) nga liboan ka mga sakop sa otoridad ang gipakatag karong panahona dinhi sa dakbayan ilabi na sa mga dapit nga adunay gipahigayon nga mga event nga kabahin sa Pasko Fiesta.
Tipik lamang kini aron nga masiguro nga dili makapahimulos ang mga dautang elemento karong holiday season diin sagad usab mogara ang mga nahisgutan.
Tungod kanunay ang pahimangno sa Davao City Police Office (DCPO) ngadto sa publiko nga kinahanglan doblehon ang pagbantay batok sa mga kadudahan nga mga tawo sa palibot ilabi na kung magsuroy-suroy sa mga lugar nga sagad dagsaon sa mga tawo.
Una ng gipahimangnoan ni DCPO Director Col. Kirby Kraft ang mga residente nga kinahanglan pabilin nga alerto aron nga malikayan ang kaso sa pagpanguot, snatching ug pick-pocketing.
Hinuon sukad nga gi-ablihan ang Pasko fiesta, nagpabilin sumala pa nga “zero major incident” ang ilang natala sa mga area nga adunay aktibidad.
Nagpahimutang sab sila ug barikada sulod sa bisinidad sa City Hall gumikan kay kini ang area diin nahimutang ang mga nag-unang displays ug fanfair sa Rizal Park ug Quezon Park nga mga open spaces.
Kuhaon lamang ang barikada paghuman sa Pasko Fiesta.
