Gikataho sa Embahada sa Pilipinas sa Warsaw nga luwas ug kompleto ang tanang Pilipino sa Ukraine human sa bag-ong missile ug drone strikes sa Russia sa Kyiv nga nakakalas og upat ka tawo ug naka-angol sa dul-an 100 ka ka mga indibidwal.
Sukad niadtong miaging weekend, padayon nang gisubay sa embahada ang kahimtang sa gagmayng komunidad sa mga Pilipino nga naa sa Kyiv ug uban pang siyudad sa Ukraine.
Una niini, naglusad ang Russia og sunod-sunod nga pag-atake sa gabii niadtong Sabado, gamit ang mga drone ug hypersonic Oreshnik intermediate-range ballistic missile.
Naguba niini ang daghang kabalayan, eskwelahan, merkado, ug usa ka museyo sa Kyiv.
Gikumpirma usab ni Ukrainian President Volodymyr Zelensky nga dili tanan ballistic missile ang napugngan sa ilang air defense, ug kadaghanan niini gituyo gayud nga targeton ang sentro nga bahin sa Ukraine.
Sumala usab sa Russian Defense Ministry, ang pag-atake maoy ganti sumala pa sa giingong pagpamomba sa Ukraine sa mga sibilyang pasilidad sulod sa Russia, usa ka akusasyon nga hugtanon usab nga gilimod sa Ukraine.
