Wala giwagtang sa Bureau of Immigration ang posibilidad nga nakagawas na sa nasud si Sen.Ronald dela Rosa human sa iyang naunang paggawas sa kustodiya sa senado.
Matud ni BI spokesperson Dana Sandoval, nagpabiling abri ang posibilidad sa paggamit og mga backdoor channels o tagong agi-anan paingon gawas sa nasud sama sa mga hilit nga pantalan.
Dugang pa niya, kanunay nga gina-konsidera sa BI ang maong anggulo matag adunay susamang sitwasyon.
Bisan paman niini, gipasalig ni Sandoval nga hugot ang pagbantay sa mga giila nga illegal migration corridors uban sa tabang sa Philippine National Police, Philippine Coast Guard, ug mga local government units.
Sumala pa, kon adunay pagsulay sa pag-ikyas, gilayon kining ginapahibalo sa BI, lakip na ang pag-ila sa mga indibidwal nga madakpan, ilabi na kon mga foreign nationals.
Base sa opisyal nga rekord sa BI, wala pay natalang paggawas sa nasud si Sen. dela Rosa. Kini taliwala sa nagpadayong Immigration Lookout Bulletin Order batok sa senador.
Gipasalig usab ni Sandoval nga kon makita si dela Rosa sa mga tugpahanan, ipahibalo dayon kini sa mga law enforcement agencies alang sa hustong aksyon.
