Mikabat na sa dul-an 100,000 ang gidaghanon sa mga tawo nga nag-edad 100 pataas sa Japan, sumala sa ilang gobyerno. Mikabat sa 99,763 ka centenarians ang natala karong tuiga ang labing taas nga ihap sa kasaysayan sa nasud ug ika-55 sunod-sunod nga tuig sa pagsaka sa ihap diin kapin 88% kanila mga kababayen-an.
Nasayran nga ang labing tigulang nga babaye sa Japan mao si Shigeko Kagawa nga 114 anyos, samtang ang labing tigulang nga lalaki mao si Kiyotaka Mizuno nga 111 anyos.
Nasayran nga ilado ang Japan isip usa sa mga nasud nga adunay labing taas nga life expectancy sa kalibotan tungod sa ilang sustansyadong pagkaon, ubos nga obesity rate, ug aktibong panginabuhi bisan tigulang na ang mga tawo.
Kasagaran sa ilang pagkaon mao ang isda ug mga utanon kon gulay samtang gamay ra ang red meat ug processed food.
Nakatabang usab ang regular nga paglakaw, paggamit og public transport, ug grupong ehersisyo nga “Radio Taiso” nga kabahin na sa ilang kultura sukad pa niadtong 1928.
Niadtong 1963, 153 lamang ang centenarians sa Japan. Pag-abot sa 1981, nahimong 1,000 kini ug misaka sa 10,000 niadtong 1998.
