Gipahugtan sa gobyerno sa probinsya sa Agusan del Sur ang preparasyon alang sa Health and Emergency Response isip kabahin sa Palarong Pambansa 2026 nga ipahigayon sa probinsya karong Mayo.
Sumala pa sa provincial government, Gipahimutang ang intensified nga pagpangandam aron masiguro ang kaluwasan ug kahimsog sa libu-libong atleta, coaches, opisyal, ug mga delegado gikan sa nagkalain-laing rehiyon sa nasud. Dugang pa, gibutyag usab ni Dr. Jacqueline Frances F. Momville, Chairperson sa Health and Emergency Response Committee ug Provincial Health Officer sa Agusan del Sur, gisiguro nga kompleto ug andam ang tanang medical ug emergency response teams aron motubag sa posibleng insidente sa panahon sa dako nga sporting event.
Lakip sa mga gihimong preparasyon mao ang pagbutang og medical stations sa nagkalain-laing playing venues ug billeting quarters, pag-deploy sa ambulansya ug medical personnel, ug pagpatuman sa hugot nga heat ug hydration protocols aron malikayan ang heat-related illnesses sa mga atleta. Dugang pa niini, aktibo usab nga gipahigayon ang disaster preparedness simulations sama sa earthquake drills, fire drills, ug evacuation exercises isip pagpahugot sa kapasidad sa probinsya sa emergency response.
Sa gipahigayon nga Final Technical Conference alang sa Palarong Pambansa 2026, opisyal nga giila si Dr. Momville isip Chairperson sa Health and Emergency Response Committee, kauban ang nagkalain-laing ahensya sa gobyerno alang sa koordinasyon sa medical ug emergency operations.
Gipasiugda usab ni Dr. Momville nga importante nga mapadayon ang pagpangandam sa health sector aron masiguro nga hapsay, luwas, ug malampuson ang unang pag-host sa Agusan del Sur sa Palarong Pambansa.
Sa kasamtangan, gipadayag sa Department of Education ug sa Provincial Government nga halos kompleto na ang tanang preparasyon lakip na ang seguridad, pasilidad, ug emergency response mechanisms.
Sa pagkakaron, gilauman nga moabot sa kapin 20,000 ka mga delegado ug mga partisipante gikan sa tibuok Pilipinas ang mitambong sa 66th Palarong Pambansa, nga pormal nga ablihan karong adlawa, Mayo 24, 2026 sa Prosperidad, Agusan del Sur.
