Gipatawag sa European Union ug pipila ka nasud sa Europa ang mga representante sa Russia human mibahad ang Moscow og posibleng pag-atake sa Kyiv ug pag-awhag sa mga langyaw, lakip na ang mga diplomat, nga mobiya sa sentro sa Ukraine.
Lakip sa nagpatawag sa Russian envoys mao ang Germany, Norway, Netherlands, Poland, ug Sweden, kini human sa pahayag sa Russia nga target nila ang mga military facility ug “decision-making centers” sa Kyiv.
Sumala sa EU diplomatic service, ilang gipatawag ang Russian chargé d’affaires aron ipahayag ang ilang hugtanong pagsupak sa gitawag nilang “unacceptable escalation,” ug ilang giingon nga magpabilin ang EU delegation sa Kyiv bisan pa sa tensyon.
Sa Norway, gipatawag si Russian Ambassador Nikolai Korchunov aron maghatag og pasabot sa giingong “klarong hulga batok sa mga foreign personnel sa Ukraine.”
Ang Poland usab nanawagan og gilayong paghunong sa gitawag nilang “illegal aggression” sa Russia.
Samtang kabahin niini, gilimod sa Russian embassy sa Germany ang mga alegasyon ug giingon nga “surgical strikes” lamang ang ilang gihimo batok sa mga target militar.
Matod sa Moscow, ang planong operasyon maoy tubag sa giingong “terrorist attacks” sa Kyiv, lakip ang insidente sa Luhansk nga nakamatay og 21 ka tawo usa ka pahayag nga gilimod sa Ukraine, nga miingon nga ang target mao ang usa ka Russian drone unit.
