Nagsugod na ang Philippine National Police (PNP) sa nationwide manhunt batok kang Sen.Ronald dela Rosa may kalabotan sa warrant of arrest nga gipagawas sa International Criminal Court.
Sumala kang PNP chief Gen. Jose Melencio Nartatez Jr., gipakatag na ang mga tracker team human gitugotan sa Department of Justice ang pagpatuman sa pag-aresto.
Gibutyag niini nga gimandoan na ang kapulisan nga magpatuman og maximum tolerance ug sundon ang hustong proseso aron maprotektahan ang katungod sa tanang nalambigit niini.
Dugang pa niya, kung madakpan si Dela Rosa, dayon kining ibutang sa kustodiya sa DOJ. Samtang, wala pa gipadayag sa DOJ kung dad-on ba dayon kini sa The Hague diin nahimutang ang detention facility sa ICC.
Gikompirma usab sa Criminal Investigation and Detection Group (CIDG) nga naa na kanila ang kopya sa ICC arrest warrant batok sa senador.
Gikanayon usab nila nga anaa gihapon sa Pilipinas si Dela Rosa bisan pa sa mga report nga nakita kuno kini sa Malaysia.
Nagpasidaan karon ang kapulisan nga mahimong kasuhan og obstruction of justice ang bisan kinsa nga motabang o mobabag sa operasyon.
Gawas sa PNP, nagpahigayon usab og bulag nga operasyon ang National Bureau of Investigation (NBI) aron pangitaon ang senador. Sumala kang NBI Director Atty. Melvin Matibag, dakpon dayon nila si Dela Rosa kon ilang matultolan.
