DAVAO REGION- Gipasigarbo sa Department of Agriculture Region 11 ang naangkon nga kadaugan sa pito ka mga mag-uuma nga nagdala ug pasidungog human nga nakaangkon ug kadaugan sa gipahigayon nga Philippine Coffee Quality Competition (PCQC).
Gikalipay ni Agriculture Director Macario Gonzaga uban ni RTD for Operations Marie Ann Constantino ug RTD for Research and Regulations Marila Corpuz ang top seven Best Arabica Coffee nga gipangpresenta sa mga mag-uuma sa kape sa rehiyon nga gipahigayon sa DA-11 Compound karong adlawa.
Usa ka Arnel Morales nga gikan sa Bansalan, Davao del Sur ang nahimong champion nga adunay score nga 84.95 ug nakadawat kini ug special award for best natural process coffee.
Samtang ang ubang coffee farmer-awardees ang gilangkuban nila Rogelio Gonzales,anaa sa ika-upat nga pwesto gikan sa BACOFA Coop, Balutakay, Bansalan, Davao Del Sur, ika-lima si Josephine Libres, sa BACOFA Coop, Balutakay, Bansalan, Davao Del Sur, ika-pito si Ronald Dicdican, BACOFA COOP, Balutakay, Bansalan, Davao Del Sur ang ika-walo si Sergio Loon, Alegre, nga taga Bansalan, Davao Del Sur, ika-siyam mao si Dione Ellaga, nga taga Managa, Davao Del Sur ug ang ika- dosi mao si Annalyn Bunal, gikan sa ATOZ Coffee Farm, nga taga Bansalan, Davao Del Sur.
Ang Philippine Coffee Quality Competition (PCQC) usa ka tinuig nga aktibidad nga nagtumong sa pagpili ug pagpromotar sa mga best quality coffees sa nasud aron nga makaaghat kini sa mga nagapananom ug kape nga molambo ang kalidad sa ilahang kape ug ingon man ang pagpromotar sa mga produkto dinhi sa nasud ug sa langyaw nga kanasuran.
