Miabot sa 32 ka mga indibidwal ang gi-aresto tungod sa kasong online libel gikan Enero 1 hangtod Mayo 15, 2026. Sumala sa Philippine National Police, mikabat sa 276 ka kaso sa online libel ang ilang napasaka sulod sa maong panahon. Subay sa datos sa PNP Anti-Cybercrime Group, ang mga nadakpan nag-atubang og kaso sa paglapas sa Republic Act 10175 o Cybercrime Prevention Act of 2012.
Ubos sa maong balaod, mas bug-at ang silot sa online libel kumpara sa traditional libel nga sakop sa Revised Penal Code. Gipasabot sa PNP nga ang online libel nagtumong sa malisyosong pagpasangil og krimen, bisyo, o bisan unsang lihok nga makadaot sa dungog ug reputasyon sa usa ka tawo pinaagi sa paggamit sa information and communication technology.
Gipahigayon ang mga pagdakop ug pagpasaka og kaso sa mga special operating units sa PNP-ACG kauban ang regional, provincial, city, ug district cyber response teams sa nagkalain-laing bahin sa nasod. Gipasiugda usab kini ni PNP Chief Police General Jose Melencio Nartatez Jr. nga bisan importante ang social media isip instrumento sa komunikasyon, kauban niini ang responsibilidad sa matag tiggamit.
Dugang pa niini, magpabilin nga lig-on ang PNP sa pagpatuman sa balaod samtang gisiguro usab ang pagtahod sa katungod sa matag indibidwal.
