Gikuwestiyon ni Sen. Jinggoy Estrada ang giingong paspas nga pag-uswag sa mga kasong gisang-at batok sa pipila ka miyembro sa majority bloc sa Senado kasabay sa iyang giatubang nga plunder ug graft case may kalabutan sa giingong flood control scandal.
Sa iyang pahayag, giingon ni Estrada nga namatikdan niya ang mas paspas nga pagsaka sa mga kaso sukad pag-ilis sa liderato sa Senado niadtong Mayo 11 diin mipuli si Sen. Alan Peter Cayetano kang kanhi Senate President Vicente Sotto III.
Gihisgutan usab sa senador nga giandam usab kuno ang mga kaso batok nila Sen. Francis Escudero, Sen. Joel Villanueva ug Sen. Rodante Marcoleta.
Nahinumduman nga gisang-at sa Office of the Ombudsman ang kasong plunder batok kang Estrada sa Sandiganbayan nga walay rekomendadong piyansa may kalabutan sa alegasyong midawat kini og ₱573 milyong kickback gikan sa flood control projects.
Mariing gilimod sa senador ang mga alegasyon ug giingong andam siyang gamiton ang tanang legal remedies aron kuwestiyonon ang kaso.
Giingon usab ni Estrada nga adunay mga ebidensyang wala kunoy natagaan og igo nga timbang lakip ang sulat gikan sa Senate Legislative Budget Research and Monitoring Office nga nag-ingong wala siyay gihimong budget insertions sa 2025 national budget.
Gipasiugda usab niini nga wala kuno siya matagaan og igo nga higayon aron masusi ang mga resolusyon sa Department of Justice ug Ombudsman sa wala pa maisumite ang kaso nga posibleng adunay epekto sa iyang katungod sa due process.
