DAVAO CITY – Gipasabot sa chairman sa Committee on Health sa 19th City Council ang kamahinungdanon sa Ordinansa diin mandato ang pagsumite sa Health ug uban pang Emergencies Contact Tracing Forms sa mga tawo nga mosulod sa siyudad pinaagi sa Land, Air or Sea.
Sumala pa kang Konsehal Mary Joselle Villafuerte nga ang nahisgutan nga ordinansa usa ka hangyo ni Mayor Sara Duterte-Carpio diin tumong niini nga makapahigayon og contact tracing sa tanan nga mga tawo nga mosulod sa hurisdiksiyon sa dakbayan.
Ang maong ordinansa una na matud pa nga gi-review sa City Legal Office ug kung ang pagpalabang kiini wala sumala pa nakasupak sa national law, isumite kini kang Chief Executive Officer, Mayor Sara Duterte-Carpio nga maoy magpatuman niini.
Kalakip sa ordinansa ang contact tracing form nga pangayuon niini ang data sa mga tawo nga mosulod sa Davao sama sa petsa sa pag-abot, tibuok pangalan, nationality, edad, sex, birthdate ug kung unsa ang gisakyan niini pasulod sa siyudad.
Kinahanglan sab sumala pa nga ibutyag sa usa ka indibidwal ang iyang residence address dinhi sa nasod, Philippine mobile number ug e-mail address.
Gipasabot sab ni Villafuerte nga tungod kay usa kini ka health and other emergency contact tracing form, angayan sab sumala pa nga ibutyag ang medical condition o kung aduna ba kini sintomas o sakit samtang pasulod sa siyudad.
Tipik lamang kini aron masiguro nga masubay pag-ayo kadtong mga tawo nga posibleng magdala ug makatakod nga sakit.
