Nagpabiling kusog ang Tropical Storm Jangmi bisan pa og medyo mihinay ang paglihok niini samtang anaa pa sa gawas sa Philippine Area of Responsibility (PAR), sumala sa state weather bureau.
Subay sa weather bulletin, katapusang namatikdan ang bagyo sa gibana-banaan nga 1,195 kilometers sa sidlakan sa Eastern Visayas alas-3 kaganihang kadlawon.
Dala niini ang maximum sustained winds nga 65 km/h duol sa sentro, paghaguros nga moabot og 80 km/h.
Naglihok ang bagyo paingon sa north northwest sa gikusgon nga 20 km/h ug gilauman nga magpadayon kini nga direksyon hangtod mosulod sa PAR sa Huwebes sa gabii o Biyernes sa buntag, Mayo 29.
Kung makasulod na sa nasud, tawgon kini nga bagyong “Domeng.” Sumala sa hingtungdan nga ahensya, posible pang mokusog ang bagyo ug mahimong moabot sa typhoon category pag-abot sa Sabado, Mayo 30.
Gilauman usab nga maabot niini ang peak intensity tali sa Sabado ug Domingo, Mayo 31, samtang anaa sa Philippine Sea sa dili pa kini hinay-hinay nga mohuyang.
Bisan pa niini, gibutyag sa weather bureau nga “less likely” na nga moigo sa yuta ang bagyo tungod sa kausaban sa forecast track.
