Nahuman na sa National Basketball Association ang pagpangandam sa duha ka hardcourt nga gamiton alang sa NBA Finals 2026. Sa mga hulagway nga gipagawas sa liga, makita ang espesyal nga disenyo sa court nga adunay hulagway sa Larry O’Brien Trophy, ang labing gitinguhang tropeyo sa NBA.
Gikatakda ang unang duwa sa NBA Finals tali sa New York Knicks ug San Antonio Spurs sa Hunyo 4, 2026 kon adlaw nga Hwebes sa Pilipinas. Ang Game 1 ug Game 2 pagadulaon sa Frost Bank Center, nga homecourt sa Spurs, samtang ang Game 3 ug Game 4 ipahigayon sa Madison Square Garden, nga homecourt sa Knicks.
Kini ang unang higayon sukad sa NBA Finals niadtong 1999 nga mag-atbang pag-usab ang duha ka team. Niadtong panahona, napildi sa Spurs ang Knicks sulod sa lima ka duwa, ug nahimo usab ang New York nga unang No. 8 seed nga nakaabot sa championship series. Karong tuiga, misubang pag-usab ang Knicks human nilang gisilhig ang Cleveland Cavaliers sa Eastern Conference Finals.
Sa laing bahin, napildi sa Spurs ang defending champion nga Oklahoma City Thunder pinaagi sa usa ka mainitong Game 7 sa Western Conference Finals. Nakatutok karon ang mga basketball fans sa tibuok kalibotan sa NBA Finals 2026 diin mabuhi pag-usab ang klasikong panagsangka sa Knicks ug Spurs.
