Nagpadayon gihapon ang tensyon ug panagbangi sa Southern Lebanon bisan pa sa gi-anunsyong ceasefire nga giingong nakab-ot pinaagi sa diplomatikong inisyatiba ni Donald Trump.
Sumala sa mga report, giingon ni Trump nga nakab-ot ang kasabutan tali sa Israel ug Hezbollah human sa iyang pakigpulong sa mga representante sa duha ka panig.
Lakip sa maong kasabutan ang paghunong sa mga pag-atake ug pagrespeto sa mga kondisyon nga gitakda aron malikayan ang dugang nga paglala sa kagubot sa rehiyon.
Gidawat usab sa Hezbollah ang kasabutan nga mohunong sa ilang mga opensiba batok sa Israel agig balos paglikay sa Israel sa pag-atake sa Beirut, subay sa mga probisyon sa diplomatikong kasabutan.
Gikumpirma ni Israeli Prime Minister Benjamin Netanyahu ang paglungtad sa maong kasabutan apan nagpasidaan nga andam ang Israel nga ipadayon ang mga operasyong militar kung magpadayon ang Hezbollah sa pag-atake sa mga lungsod ug sibilyan sa Israel.
Bisan pa niini, giingon sa Hezbollah nga naglunsad gihapon sila og drone ug artillery attacks batok sa mga pwersa sa Israel.
Sa laing bahin, gitaho sa Israel nga ilang naharang ang duha ka projectile nga giingong gipabuto gikan sa Lebanon.
Gireport usab ang bag-ong mga airstrike nga gihimo sa Israel sa Southern Lebanon, nga nakapukaw og kabalaka sa posibleng pagkapakyas sa kasamtangang ceasefire agreement.
Samtang, nagpahimangno ang Iran nga ang bisan unsang paglapas sa ceasefire sa Lebanon mahimong isipon nga paglapas usab sa kasamtangang kasabutan tali sa Iran ug Estados Unidos.
Bisan pa sa nagpadayong mga insidente, gipadayon ni Trump ang iyang pag-angkon nga epektibo gihapon ang kasabutan ug nga naglihok pa ang mga diplomatikong paningkamot aron masiguro ang kalinaw ug kalig-on sa rehiyon.
