Misaka ang HIV cases sa Davao City nga nagpadayon sa pagsaka sa tuig 2025, diin nag-average og 57 hangtod 58 ka bag-ong kaso matag bulan, base sa City Health Data, nga nagpadasig og mas kusog nga kampanya sa edukasyon ug prevention ilabi na sa kabatan-onan.
Gi-report nga miabot sa 691 ang total nga HIV cases sa 2025, diin 58 ka kaso natala sa Disyembre pa lang, nga nagpahimutang sa Davao City isip ika-lima sa tibuok nasud nga adunay pinakataas nga reported cases.
Sumala pa ni Dr. Jordana P. Ramiterre, Head Physician sa Republic Health and Wellness Center (RHWC), ang pagsaka sa kaso sa mga minors ug mga batang hamtong nagpakita sa dinalian nga panginahanglan sa pagpalig-on sa education ug prevention efforts.
Lakip sa pinaka-apektado mao ang age group nga 24 hangtod 35 anyos, gisundan sa 15 hangtod 24 anyos, samtang ang pinakabata nga natala mao ang 14 anyos. Dugang pa, gikanayon sa health officials nga sexual transmission mao gihapon ang nag-unang rason sa impeksyon sa syudad, labi na sa males having sex with males (MSM), gisundan sa bisexual ug heterosexual transmission.
Gipadayag usab sa RHWC nga libre ug accessible ang HIV testing ug treatment sa gobyerno, lakip ang antiretroviral drugs nga gipamalit sa estado aron masiguro ang padayon nga access sa tambal.
Gi-ila usab ang paggamit sa PrEP (pre-exposure prophylaxis) ug ang U=U (undetectable equals untransmittable) campaign isip importanteng preventive measures batok sa HIV.
Sa kasamtangan, giangkon sa health sector nga nagpabilin ang stigma ug diskriminasyon isip dakong babag sa HIV testing ug treatment tungod sa kahadlok ug kakulang sa kahibalo, sumala ni Nidgie Tindoc sa SPMC, nga nakapugong sa daghang indibidwal sa pagpacheck up.
Gipalig-on sa Davao City ang outreach ug education campaigns pinaagi sa pakigtambayayong sa mga NGO ug workplace awareness programs, ug gihimo usab ang International AIDS Candlelight Memorial sa Rizal Park nga adunay free HIV screening ug candle-lighting ceremony isip kampanya sa kahibalo ug paghinumdom sa mga apektado sa HIV/AIDS.
