DAVAO CITY – Dungan sa pagkansela sa mga event, suspensiyon sa klase ug community quarantine tungod sa coronavirus disease (Covid-19), nag-antus sumala pa karon og dakong kawad-on sa ilang income ang mga taxi drivers bisan pa man nga nagpatuman ang pipila ka mga taxi operators ug rental discounts.
Daghanang taxi drivers ang mapasalamaton sa P200 rental discount sa ilang matag adlaw nga daily boundary apan wala sumala pa kini kalahian sa ordinary nga adlaw sanglit dyutay lamang sab ang mga pasahero nga mosakay karong panahona.
Gani kadaghanan sumala pa sa mga nahisgutan ang makauli lamang karon ug P100 ngadto na sa P200.
Kahinumduman nga una ng gihangyo sa Region 11 Taxi Operators Association Inc. (R-TOA) ngadto sa ilang member-operators nga mohatag ug P200 discount sa ilang rental ngadto sa mga taxi drivers sanglit nihit karon ang pamasada sa mga nahisgutan tungod sa pagkuyanap sa Covid-19.
Samtang padayon nga gi-awhag karon ni R-TOA president Rogelio Largo ang tanan nga mga member-operators sa asosasyon nga motamud sa direktiba sa Land Transportation and Franchising Regulatory Board diin kinahanglan nga mosuot ang tanan nga mga taxi drivers ug face masks panahon nga moduty ug i-sanitize ang ilang mga taxi units ayha o human ang ilang pagpamasada.
