Mitanyag og legal nga tabang ang Free Legal Assistance Group (FLAG) sa bag-ong natukod nga Truth and Reconciliation Commission nga magdokumento sa mga patay ug mga insidente sa kapintas atol sa kampanya batok sa iligal nga droga sa administrasyon ni kanhing Pangulong Rodrigo Duterte.
Sa opisyal nga pahayag sa grupo, ilang gisuportahan ang trabaho sa komisyon ug gipasiugda ang kahinungdanon sa pagdokumento ug pagsusi pag-usab sa mga nahitabo atol sa maong panahon.
Matud sa FLAG, daghan sa mga kaso sa pagpamatay ang wala naimbestigahi ug wala na matagad ilabina human mibulag ang Pilipinas sa Rome Statute nga nakaapekto sa sakop sa hurisdiksyon sa International Criminal Court (ICC) sa pipila ka mga kaso.
Tungod niini, giingon sa grupo nga importante ang Truth and Reconciliation Commission aron masuta ang mga kaso nga matud nila nabaon na sa kalimot, wala madokumento ug wala matagaan og hustisya.
Gibarugan usab sa FLAG nga ang maong komisyon mahimong plataporma aron madungog ang tingog sa mga survivor, pamilya sa mga biktima ug mga testigo nga hangtod karon nagpas-an sa epekto sa pagkawala sa ilang mga mahal sa kinabuhi.
Nahinumduman nga sumala sa pipila ka human rights groups, mokabat kuno sa 30,000 ang namatay sa kontrobersyal nga kampanya batok sa droga, samtang gibana-bana sa United Nations nga mokabat kini sa 18,000. Apan base sa rekord sa Philippine National Police (PNP), kapin 6,000 lamang ang opisyal nga napatay sa maong kampanya.
