DAVAO CITY – Mitabang gilayon ang mga kasundalohan nga sakop sa 39th Infantry Battalion sa Local Disaster Risk Reduction Management Council (LDRRMC) sa Makilala aron nga matukod pagbalik ang tent city, nga una ng nadaut sa kusog nga hailstorm sa milabay nga adlaw.
Sumala pa kang Lt. Col. Ezra Balagtey, tigpamaba sa Eastern Mindanao Command, nga human ang gipahigayon nga relief operations gilayon nga mitabang ang mga nahisgutan sa apektadong bakwit sa upat ka mga evacuation areas.
Mitabang ang mga nahisgutan sa 534th ug 512th engineering battalions.
Kahinumduman nga ang Eastern Mindanao Command maoy nagpatuman sa alert level ug gimando ang activation sa Humanitarian and Disaster Response Task Force aron nga i-assist ang mga nagkadaiyang disaster risk management councils human ang sunod-sunod nga linog sa milabay nga bulan.
Nasayran nga ang EastMinCom maoy nakatutok sa disaster response pinaagi sa 10th ID, kaabag ang 1002nd Infantry Brigade, 901st Infantry Brigade, 512th Engineering Battalion, 534th Engineering Battalion, ug 10th Division Emergency Response Company.
Dinhi sa dakbayan sa Davao, ang 11th Forward Service Support Unit ang gipalapdan pinaagi sa Joint Logistics Center aron nga suportahan ug mohatud ug logistical needs sa National Disaster Risk Reduction Management Council sa mga apektadong areas.
