Nakatala ang Department of Health (DOH) og kapin 4,600 ka bag-ong kaso sa human immunodeficiency virus o HIV sa nasud sulod sa unang tulo ka bulan sa 2026.
Subay sa pinakaulahing datos gikan sa HIV and AIDS Surveillance of the Philippines, miabot sa 4,633 ka bag-ong HIV cases ang na-rekord gikan Enero hangtod Marso karong tuiga, nga siyam ka porsiyento nga mas taas kumpara sa samang panahon niadtong miaging tuig.
Dugang pa niini, giingon sa DOH nga 1,104 o 24 porsiyento sa mga bag-ong kaso anaa na sa advanced HIV stage sa dihang nadayagnos sila.
Lakip sa report, miabot sa average nga 51 ka kaso matag adlaw ang naka lista karong quarter.
Apan mas ubos kini og 11 porsiyento kumpara sa 57 ka adlaw-adlaw nga kaso nga natala sa samang panahon niadtong 2025.
Sa kasamtangan, ang average monthly cases anaa sa 1,544 nga mas ubos usab og siyam ka porsiyento kumpara sa 1,693 monthly cases niadtong miaging tuig.
Ang Pinakataas nga kaso mao ang sa National Capital Region (NCR) nga adunay 989 infections, gisundan sa Calabarzon nga adunay 808, Central Luzon nga adunay 551, Soccsksargen nga adunay 277, ug Davao Region nga adunay 263 ka kaso.
Sumala pa sa DOH, kining lima ka rehiyon maoy naglangkob sa 62 porsiyento o 2,888 sa tanang bag-ong HIV cases sa nasud sulod sa maong panahon. Kadaghanan sa mga bag-ong kaso mga lalaki diin 4,381 ang male cases samtang 252 ang mga babaye.
Ang edad sa mga bag-ong natala nga kaso gikan sa duha ka tuig hangtod 77 anyos.
Base usab sa National HIV Care Cascade niadtong Marso 2026, gibanabana nga adunay kapin 288,000 ka mga tawo sa Pilipinas nga nagkinabuhi nga adunay HIV, apan 55 porsiyento pa lamang o 157,350 ang kumpirmadong diagnosed o laboratory-confirmed.
