Gipadayag ni Senador Panfilo “Ping” Lacson nga dili siya ang vice Chairperson sa Senate Blue Ribbon Committee ug wala pa kini mahuman ang reorganisasyon ug pormal nga eleksyon sa mga myembro sa komite sa senado. Sumala pa kang Lacson, abli siya nga mahimong miyembro sa komite apan dili niya dawaton ang posisyon isip vice chair kung kini itanyag kaniya.
Matud pa ni Lacson, “mouyon ko mahimong myembro, apan kung vice chair, dili ko musugot” . Dugang pa, gipadayag usab niya nga posible dili kini makabenepisyo sa mga miyembro sa kasamtangan mayorya, ilabina kay wala kini mipirma gikan kanila sa naunang partial committee report sa blue ribbon committee.
Giangkon usab sa beteranong senador nga mas gipili niya nga tumanon lamang ang iyang katungdanan bisan pa og moresulta kini sa batikos o pagkabaton og bag-ong kontra sa politika. Gipanghimakak usab ni Lacson ang mga alegasyon nga iyang giprotektahan si kanhing House Speaker Martin Romualdez may kalabotan sa giingong flood control scam, ug gipasiugda nga wala siya’y personal nga koneksyon niini.
Sa pagkakaron, si Senador Pia Cayetano ang gipahimutang nga chairperson sa Blue Ribbon Committee, apan wala pa’y opisyal nga pahayag kabahin sa sunod nga mga lakang sa imbestigasyon sa flood control scam.
