Nag-atubang og reklamo si kanhing Senate President Francis Escudero sa Ombudsman kalabot sa kasong plunder, graft ug indirect bribery.
Sumala sa report, niadtong Abril 16, girekomenda sa Field Investigation Office (FIO) ang pagpasaka og kaso batok sa senador human giingon nga nakadawat siya og gibanabana nga P306 milyon ug P280 milyon isip suhol gikan sa nagkalain-laing flood control projects.
Subay sa testimonya ni kanhi DPWH Undersecretary Roberto Bernardo, giapil sa kaso ang usa ka indibiduwal nga si Maynard Ngu isip giingon nga tigpataliwala o bagman ni Escudero sa mga transaksyon niadtong 2024 ug 2025, nga nagkantidad og mga gatusan ka milyon ka pesos gikan sa nagkalain-laing proyekto sa Metro Manila, Visayas, ug pipila ka lugar sa Luzon.
Gipatin-aw usab ni Escudero nga dili kini tinuod ang mga alegasyon, ug iya kining gi-insistir nga wala kini koneksyon kang Ngu ug wala usab ebidensya nga makapamatuod nga nakadawat siya og kwarta. Matud pa niya, ang mga akusasyon nakabase lamang sa pahayag sa usa ka indibiduwal ud dili kini sa konkretong ebidensya.
Gihangyo usab sa senador sa Office of the Ombudsman nga dili hatagan og immunity ang pipila ka mga testigo, lakip si Bernardo, dugang pa iya kining gi-insistir nga adunay mga pahayag nga dili kuno magkapariho sa nagkalain-laing affidavit ug pagdungog.
Sa pagkakaron, gilauman nga desisyunan sa Office of the Ombudsman kung ipasaka ba ang kaso sa Sandiganbayan batok sa maong mambabalaud.
