Gipanghimakak sa kampo ni Senador Ronald “Bato” dela Rosa ang pahayag sa National Bureau of Investigation (NBI) nga giingong “armado ug delikado” ang senador, ug ilang giingon nga wala kini igo o lig-on nga basihan.
Sumala ni Atty. Israelito Torreon, abogado sa senador, dili angay ang maong paghulagway ug dili kini makatabang sa hapsay nga pag-atubang sa mga legal nga isyu nga giatubang sa mambabalaod. Giingon pa niya nga ang senador usa ka napiling opisyal sa katawhan nga kalmado nga nagatuman sa iyang katungdanan isip usa ka public servant.
“Bug-os nga pagtahod, apan hugot namong gipanghimakak ang pahayag nga siya kuno armado ug delikado,” matud pa sa kampo ni Dela Rosa.
Sa bahin sa NBI, gipatin-aw sa ahensya nga ang maong pahayag kabahin sa ilang standard operational protocol sa mga operasyon batok sa mga indibidwal nga giingong gipangita sa balaod.
Dugang pa, nanawagan ang kampo ni Dela Rosa sa mga otoridad nga magpakita og pasensya samtang naghulat sa desisyon sa Korte Suprema may kalabotan sa ilang gi-file nga mosyon nga mag-usab sa unang desisyon nga midumili sa interim relief.
Matud sa mga report, si Senador Dela Rosa adunay warrant gikan sa International Criminal Court (ICC) human siya giila isip giingong co-perpetrator ni kanhi Pangulong Rodrigo Duterte sa kampanya kontra ilegal nga droga sa iyang administrasyon.
Sa kasamtangan, miundang ang senador sa pagpakita sa Senado niadtong Mayo 14, pipila ka oras human sa insidente sa pagpamusil sulod sa Senado, ug hangtod karon wala pa gihapon mahibal-an ang iyang nahimutangan.
