Nakatala ang PHIVOLCS og 498 ka mga aftershock gikan sa duha ka linog.
Matod sa PHIVOLCS, ang aftershock mao ang mga gagmayng linog nga mosunod pagkahuman sa usa ka mas kusog nga linog kon (mainshock).
Ang mga aftershock mahimong magpadayon sulod sa pipila ka adlaw ug semana diin kasagaran usa ka magnitude ang ubos kung itandi sa main shock.
Samtang gipaklaro sa nasampit nga ahensya nga ang nahitabong pagtay-og kagabii mao ang ikaduha nga kusog nga linog og dili kini kabahin sa aftershocks.
Kahinumduman nga una na nga mitay-og ang magnitude 7.4 ang nahitabo 43 kilometros sa kadagatan nga sidlakan sa Manay, Davao Oriental, alas 9:43 sa buntag ug paglabay sa pipila ka mga oras nasundan kini ug kusog nga linog nga magnitude 6.8 nga nahitabo 36 kilometros sa habagatan sa kadagatan sa Manay, alas 7:12 sa kagabii.
Sumala sa PHIVOLCS, ang ikaduhang linog dili aftershock apan usa kini ka “doublet.”
Gibutyag sa direktor sa PHIVOLCS nga si Teresito Bacolcol nga ang “doublet” nagtumong sa duha ka linog nga duol lamang og oras ug lugar nga nahitaboan kon lahi og epicenter.
Gipahayag usab sa PHIVOLCS nga dili kini ang unang higayon nga nahitabo ang usa ka doublet earthquake.
Matod ni Bacolcol, susama nga insidente ang nahitabo niadtong 1992 ug 2023.
Giklaro usab sa PHIVOLCS nga ang mga linog sa Davao Oriental walay kalabotan sa magnitude 6.9 nga linog nga natala sa Bogo City, Cebu, niadtong Septiyembre 30.
Ang hinungdan sa linog sa Cebu nga magnitude 6.9 niadtong Septiyembre 30 mao ang Bogo Bay Fault.
Samtang sa Davao Oriental ang gikan sa Philippine Trench.
Sa laing bahin, dul-an 107,000 ka mga indibidwal ang apektado nga giserbisyuhan sa DSWD.
