Gibutyag sa Malacañang Palace nga nagpabiling balido ang arrest warrant sa International Criminal Court batok kang Ronald dela Rosa human wala tugoti sa Supreme Court of the Philippines ang hangyo sa iyang kampo alang sa temporary restraining order o TRO aron mapugngan ang pagpatuman niini.
Matod ni Palace Press Officer Atty. Claire Castro, giila sa gobyerno nga adunay gihapoy bisa ang warrant ug ang legal nga interpretasyon ug operational nga mga lakang anaa na sa pagdumala sa Department of Justice o DOJ.
Dugang pa niya, walay babag sa pagpatuman sa warrant tungod kay walay gipagawas nga TRO ang Korte Suprema.
Gihisgutan usab ni Castro ang posisyon sa Office of the Solicitor General o OSG nga nag-isip kang Dela Rosa isip “fugitive” human kini migawas sa Senado bisan anaa siya ilawom sa protective custody.
Matod pa niya, gisusi usab karon sa mga awtoridad ang ubang ebidensya may kalabutan sa paggawas ni Dela Rosa sa Senado, lakip ang mga video footage nga posibleng mahimong kabahin sa mga imbestigasyon sa DOJ, Department of the Interior and Local Government o DILG, ug Office of the Ombudsman.
Samtang, gibutyag ni Castro nga magpabilin nga nakapokus si Pang. Ferdinand Marcos Jr. sa pagsunod sa balaod ug sa rule of law taliwala sa maong isyu.
