Gikumpirma ni House impeachment prosecutor ug Bicol Saro Representative Terry Ridon nga ang unang ipresenta sa prosecution panel sa Senado mao ang articles of impeachment may kalabutan sa giingong hulga ni VP Sara Duterte-Carpio batok kang Pang. Ferdinand Marcos Jr..
Sumala ni Ridon, pangunahan ni Senior Deputy Majority Leader Lorenz Defensor ang presentasyon sa unang artikulo.
Sunod niini ang mga isyu sa giingong dili mapasabut nga bahandi, paggamit sa kapin P612 milyones nga confidential funds, ug giingong bribery allegations sulod sa Department of Education o DepEd.
Gibutyag ni Ridon nga organisado ang pagkahan-ay sa presentasyon base sa kusog sa ebidensya ug sa kasayon sa pagpamatuod sa mga alegasyon.
Matod pa niya, kumpyansa ang prosecution panel nga igo ang ilang ebidensya aron makuha ang gikinahanglang boto alang sa conviction. Usa sa mga basehan sa impeachment complaint mao ang pahayag ni VP Duterte niadtong Nobyembre 2024 diin iyang giingong adunay gisugo kini nga tawo aron patyon sila Pangulong Marcos, First Lady Liza Araneta-Marcos ug kanhi House Speaker Martin Romualdez kon adunay mahitabo usab kaniya.
