Nagpasidaan ang Philippine Atmospheric, Geophysical and Astronomical Services Administration o PAGASA nga posibleng makasinati ang Pilipinas og kusog nga mga bagyo sugod Hunyo hangtod Agosto, busa giawhag nang daan ang publiko nga mangandam sa posibleng epekto niini.
Posibleng maporma ang kusog nga weather systems pinaagi sa pagsagol sa habagat ug sa gitawag nga Super El Niño, nga mahimong hinungdan sa grabeng pag-ulan ug pagbaha sa pipila ka bahin sa nasod.
Base sa pagtuon sa ahensya, moabot sumala pa sa 92% ang posibilidad sa maong kombinasyon sa mga weather pattern.
Matod sa state weather bureau, posible nga mosamot ang epekto sa habagat, ilabi na sa western section sa nasod, kung magdungan kini sa pagsugod sa ting-ulan.
Dugang pa sa weather bureau, bisan mahimong gamay lamang ang mamugna nga mga bagyo niining panahona, posible usasab nga mahimong kusog kini ug makadala og grabeng ulan, kusog nga hangin, o katag-katag nga pag-ulan nga adunay kauban nga hangin.
Nasayran nga sa milabay nga mga semana, pipila ka lugar sa nasod ang dali usab nga gibaha bisan thunderstorm lamang ang nasinati-an nga kahimtang sa panahon.
Tungod niini, gipahimangnoan ang mga residente sa flood-prone areas nga mangandam, ilabi na nga nagpabilin gihapon ang mga isyu sa flood control projects sa pipila ka bahin sa nasod.
